विशेष प्रतिनिधी
मुर्शिदाबाद (पश्चिम बंगाल) : पश्चिम बंगालमधील मुर्शिदाबाद जिल्ह्यात सध्या वक्फ सुधारणा विधेयकाच्या विरोधात सुरू असलेल्या आंदोलनांनी हिंसक वळण घेतले असून, या पार्श्वभूमीवर तृणमूल काँग्रेसचे खासदार आणि माजी क्रिकेटपटू युसुफ पठाण यांच्या एका सोशल मीडिया पोस्टमुळे मोठा वाद निर्माण झाला आहे.
शनिवारी (१२ एप्रिल) युसुफ पठाण यांनी इंस्टाग्रामवर एक फोटो शेअर केला, ज्यामध्ये ते हिरवाईने भरलेल्या शांत परिसरात चहा पिताना दिसत आहेत. त्यांनी या फोटोला दिलेले कॅप्शन होते – “छान दुपार, चांगला चहा आणि शांत परिसर. या क्षणाचा आनंद घेत आहे.” या फोटोवर लगेचच सोशल मीडियावर टीकांची झोड उठली. अनेकांनी विचारले की, राज्यात जातीय आणि धार्मिक तणावाचा भडका उडालेला असताना खासदार सुट्टीचा आनंद कसा घेत आहेत?
या पोस्टवर भाजपने तीव्र प्रतिक्रिया दिली आहे. भाजपचे प्रवक्ते शहजाद पूनावाला यांनी युसुफ पठाण यांच्यावर सडकून टीका करत म्हटले, “बंगाल जळत असताना तृणमूल काँग्रेसचे खासदार चहा पित आहेत. हिंदूंवर हल्ले होत असताना ते शांत चहा पित बसले आहेत. ममता बॅनर्जी सरकार पोलीस यंत्रणेला दुर्लक्ष करत हिंसाचाराला चालना देत आहे.”
पश्चिम बंगालमध्ये सध्या वक्फ कायद्याविरोधात निदर्शने सुरू असून, काही ठिकाणी ही आंदोलनं हिंसक झाली आहेत. मुर्शिदाबादमध्ये झालेल्या हिंसाचारात मृत्यू आणि जाळपोळीच्या घटना समोर आल्या आहेत. कोलकाता उच्च न्यायालयानेही या परिस्थितीची गंभीर दखल घेत केंद्र सरकारला केंद्रीय सुरक्षा दल तैनात करण्याचे आदेश दिले आहेत.
दरम्यान, युसुफ पठाण हे बहरामपूरमधून खासदार म्हणून निवडून आले असून त्यांनी नुकत्याच झालेल्या निवडणुकीत काँग्रेसचे ज्येष्ठ नेते अधीर रंजन चौधरी यांचा पराभव केला होता. मात्र, सध्या त्यांच्या वादग्रस्त वागणुकीमुळे त्यांच्यावर टीकेचा भडिमार होत आहे. अद्याप युसुफ पठाण यांनी या संपूर्ण प्रकरणावर कोणतीही प्रतिक्रिया दिलेली नाही.
MP is drinking tea while Bengal is burning; BJP slams Yusuf Pathan
महत्वाच्या बातम्या
