विशेष प्रतिनिधी
मुंबई: देशात आर्थिक मंदीची चर्चा होत असली तरी प्रत्यक्षात भारत आज जगातील सर्वात वेगाने वाढणारी अर्थव्यवस्था असून लवकरच 5 ट्रिलियन डॉलरच्या अर्थव्यवस्थेचा टप्पा गाठणार आहे, असा ठाम दावा मुख्यमंत्री देवेंद्र फडणवीस यांनी केला.
पंतप्रधान नरेंद्र मोदी यांच्या नेतृत्वाखालील एनडीए सरकारच्या कार्यकाळाला 12 वर्षे पूर्ण झाल्याच्या निमित्ताने मुंबईत आयोजित पत्रकार परिषदेत ते बोलत होते.
यावेळी फडणवीस यांनी मोदी सरकारच्या काळात देशाच्या आर्थिक स्थितीत झालेल्या बदलांचा आढावा घेत विरोधकांकडून करण्यात येणाऱ्या मंदीच्या दाव्यांवरही टीका केली. “लोक सातत्याने मंदीची चर्चा करत आहेत, मात्र वस्तुस्थिती अशी आहे की चालू आर्थिक वर्षात भारताचा विकासदर 7 टक्क्यांपेक्षा अधिक राहिला आहे. आज भारत ही जगातील सर्वाधिक वेगाने वाढणारी मोठी अर्थव्यवस्था आहे,” असे ते म्हणाले.
मुख्यमंत्र्यांनी सांगितले की, भारतीय अर्थव्यवस्थेचा आकार सध्या सुमारे 345 लाख कोटी रुपयांपर्यंत पोहोचला असून देश वेगाने 5 ट्रिलियन डॉलर अर्थव्यवस्थेकडे वाटचाल करत आहे. जागतिक आर्थिक अनिश्चिततेच्या काळातही भारताने विकासाचा वेग कायम राखला आहे, ही मोठी उपलब्धी असल्याचे त्यांनी नमूद केले.
फडणवीस यांनी देशाच्या परकीय चलनसाठ्याबाबतही महत्त्वाची माहिती दिली. त्यांच्या मते, भारताकडे सध्या सुमारे 67 लाख कोटी रुपयांचा परकीय चलनसाठा उपलब्ध आहे. या साठ्याच्या आधारे देश पुढील 11 महिन्यांच्या आयातीचा खर्च सहज भागवू शकतो. तसेच भारतावरील एकूण विदेशी कर्जापैकी जवळपास 94 टक्के कर्जाची परतफेड करण्याची क्षमता देखील या साठ्यात आहे.
“एक काळ असा होता की भारत विदेशी कर्जाच्या ओझ्याखाली दबला होता. जागतिक स्तरावर भारताचा समावेश ‘फ्रेजाइल फाइव्ह’ अर्थव्यवस्थांमध्ये केला जात होता. जागतिक बँक आणि आंतरराष्ट्रीय नाणेनिधीनेही भारताला कर्जाच्या सापळ्याबाबत इशारा दिला होता. त्या वेळी देशाकडे कर्जफेडीसाठी पुरेसा परकीय चलनसाठा नव्हता. मात्र आज परिस्थिती पूर्णपणे बदलली आहे,” असे फडणवीस म्हणाले.
यावेळी त्यांनी यूपीए आणि एनडीए सरकारांच्या कार्यकाळातील आर्थिक परिस्थितीची तुलना करताना म्हटले की, यूपीए सरकारच्या काळात भारताकडे एका महिन्याची आयात करण्याइतकाही परकीय चलनसाठा उपलब्ध नसल्याची परिस्थिती निर्माण झाली होती. मात्र आज भारताकडे तब्बल 11 महिन्यांच्या आयातीसाठी आवश्यक निधी राखीव स्वरूपात उपलब्ध आहे.
त्यांच्या मते, पायाभूत सुविधांमध्ये झालेली गुंतवणूक, डिजिटल अर्थव्यवस्थेचा विस्तार, उत्पादन क्षेत्राला मिळालेली चालना, परदेशी गुंतवणुकीत झालेली वाढ आणि आर्थिक सुधारणांमुळे भारताने जागतिक अर्थव्यवस्थेत आपले स्थान अधिक मजबूत केले आहे.
भारताचे भविष्य उज्ज्वल
पत्रकार परिषदेत बोलताना फडणवीस यांनी भारताचे भविष्य “सोनेरी आणि उज्ज्वल” असल्याचे सांगितले. जागतिक आर्थिक आव्हानांमध्येही भारत विकासाचा वेग कायम ठेवत असून, पुढील काही वर्षांत भारत जगातील अग्रगण्य आर्थिक महासत्तांपैकी एक बनेल, असा विश्वास त्यांनी व्यक्त केला.
मोदी सरकारच्या नेतृत्वाखाली देशाने आर्थिक स्थैर्य, मजबूत परकीय चलनसाठा आणि वेगवान विकासदर यांचा संगम साधला असून, आगामी काळात भारताची अर्थव्यवस्था आणखी बळकट होणार असल्याचा दावा त्यांनी यावेळी केला.
On Track to Become $5 Trillion Economy, Says CM Fadnavis
महत्वाच्या बातम्या
