सोनम वांगचूक यांचे उपोषण मागे, पण जंतर-मंतरवरील आंदोलन सुरूच राहणार

विशेष प्रतिनिधी

नवी दिल्ली : नीट पेपरफुटी प्रकरणावरून देशभरात सुरू असलेल्या आंदोलनाला महत्त्वाचे वळण मिळाले आहे. सामाजिक कार्यकर्ते सोनम वांगचूक यांनी तब्बल २६ दिवसांनंतर आपले आमरण उपोषण मागे घेतले असले, तरी कॉकरोच जनता पार्टीचे संस्थापक अभिजीत दिपके यांनी जंतर-मंतरवरील आंदोलन सुरूच राहणार असल्याचे स्पष्ट केले आहे. केंद्रीय शिक्षणमंत्री धर्मेंद्र प्रधान यांनी या प्रकरणाची राजकीय आणि नैतिक जबाबदारी स्वीकारून राजीनामा द्यावा, ही मागणी पूर्ण होईपर्यंत आंदोलन थांबणार नसल्याची भूमिका त्यांनी मांडली आहे.

सोनम वांगचूक यांनी केंद्रीय मंत्री जे. पी. नड्डा आणि डॉ. जितेंद्र सिंह यांच्यासोबत झालेल्या चर्चेनंतर उपोषण मागे घेण्याचा निर्णय जाहीर केला. गेल्या २६ दिवसांपासून ते नीट पेपरफुटी प्रकरणात निष्पक्ष चौकशी, दोषींवर कठोर कारवाई आणि विद्यार्थ्यांना न्याय मिळावा, या मागण्यांसाठी उपोषण करत होते. त्यांच्या प्रकृतीबाबत चिंता वाढत असतानाच केंद्र सरकारच्या प्रतिनिधींशी झालेल्या चर्चेनंतर त्यांनी उपोषणाची सांगता केली.

यानंतर पंतप्रधान नरेंद्र मोदी यांनीही देशाला उद्देशून व्हिडिओ संदेश जारी करत नीट पेपरफुटी प्रकरणावर सार्वजनिक भूमिका मांडली. परीक्षा व्यवस्थेवरील विद्यार्थ्यांचा विश्वास कायम ठेवणे आणि दोषींना शिक्षा करणे ही सरकारची जबाबदारी असल्याचा संदेश त्यांनी दिल्याचे सांगण्यात आले. मात्र, सरकारकडून प्रतिक्रिया आल्यानंतर आणि वांगचूक यांनी उपोषण मागे घेतल्यानंतरही आंदोलन पूर्णपणे थांबणार नसल्याचे कॉकरोच जनता पार्टीने स्पष्ट केले आहे.

अभिजीत दिपके यांनी समाजमाध्यमांवर पोस्ट करत सोनम वांगचूक यांच्या निर्णयाचे स्वागत केले. त्यांनी म्हटले की, वांगचूक यांनी उपोषण संपवल्यामुळे आंदोलनकर्त्यांना दिलासा मिळाला आहे. स्वतःचा जीव धोक्यात घालून त्यांनी संपूर्ण देशाचे लक्ष विद्यार्थ्यांच्या प्रश्नांकडे वेधले. त्यांचे धैर्य, त्याग आणि संघर्ष प्रेरणादायी असून त्यांचे आयुष्य देशासाठी अत्यंत मौल्यवान आहे.

दिपके यांनी स्पष्ट केले की, सोनम वांगचूक यांनी उपोषण मागे घेतले असले तरी नीट पेपरफुटीच्या प्रश्नावर सुरू झालेला संघर्ष अद्याप संपलेला नाही. जंतर-मंतरवर कॉकरोच जनता पार्टीच्या नेतृत्वाखाली सुरू असलेले शांततापूर्ण आंदोलन पुढेही सुरू राहणार आहे. विद्यार्थ्यांच्या मागण्यांवर ठोस निर्णय होत नाही आणि केंद्रीय शिक्षणमंत्री धर्मेंद्र प्रधान राजीनामा देत नाहीत, तोपर्यंत आंदोलन मागे घेतले जाणार नसल्याचे त्यांनी सांगितले.

• Devedra Fadanvis : कर्जमाफीची पहिली यादी आज; 68 लाख शेतकऱ्यांना लाभ; तिजोरीवर 4,400 कोटी रुपयांचा अतिरिक्त बोजा

कॉकरोच जनता पार्टीने धर्मेंद्र प्रधान यांच्यावर परीक्षा व्यवस्थेतील कथित अनियमितता रोखण्यात अपयश आल्याचा आरोप केला आहे. नीट पेपरफुटीमुळे लाखो विद्यार्थ्यांच्या भविष्यावर परिणाम झाला असून केवळ चौकशीची घोषणा करून प्रकरण संपवता येणार नाही, असे पक्षाचे म्हणणे आहे. संबंधित मंत्र्यांनी नैतिक जबाबदारी स्वीकारणे आवश्यक असल्याची भूमिका CJP ने कायम ठेवली आहे.

जंतर-मंतरवर सुरू असलेल्या आंदोलनात देशातील विविध राज्यांमधून विद्यार्थी, पालक, सामाजिक कार्यकर्ते आणि युवक संघटनांचे प्रतिनिधी सहभागी झाले आहेत. आंदोलकांकडून परीक्षा प्रक्रियेतील पारदर्शकता, पेपरफुटी प्रकरणाची स्वतंत्र चौकशी, दोषींवर कठोर कारवाई आणि भविष्यात अशा घटना टाळण्यासाठी सक्षम यंत्रणा उभारण्याची मागणी केली जात आहे.

दरम्यान, आंदोलनाच्या पार्श्वभूमीवर जंतर-मंतर आणि आसपासच्या परिसरात पोलिसांचा बंदोबस्त कायम ठेवण्यात आला आहे. आंदोलकांना शांतता राखण्याचे आवाहन करण्यात आले असून, कोणत्याही प्रकारचा कायदा आणि सुव्यवस्थेचा प्रश्न निर्माण होऊ नये यासाठी अतिरिक्त पोलीस कर्मचारी तैनात करण्यात आले आहेत.

Wangchuk Ends Fast, But CJP Protest at Jantar Mantar to Continue