विशेष प्रतिनिधी
पुणे: क्रांतिसूर्य महात्मा जोतिराव फुले यांच्या २०० व्या जयंतीनिमित्त आज संपूर्ण महाराष्ट्रात उत्साहाचे वातावरण आहे. याच निमित्ताने प्रसिद्ध अभिनेता आणि लेखक गिरीश कुलकर्णी यांनी पुण्यातील महात्मा फुले यांच्या निवासस्थानी म्हणजेच ‘फुलेवाडा’ येथे जाऊन त्यांना विनम्र अभिवादन केले. यावेळी गिरीश कुलकर्णी यांनी समाजातील वाढत्या अंधश्रद्धेवर आणि मानवी चारित्र्यावर होणाऱ्या आघातांवर चिंता व्यक्त केली.
‘देऊळ’ चित्रपटाचा संदर्भ आणि सद्यस्थिती
माध्यमांशी बोलताना गिरीश कुलकर्णी म्हणाले की, “आयुष्यात लक्षात राहण्यासारखे काही मोजकेच दिवस असतात आणि आजचा दिवस माझ्यासाठी त्यापैकीच एक आहे. फुलेवाड्यात मी याआधीही अनेकदा आलो आहे, पण आजच्या ऐतिहासिक दिवशी इथे येऊन नतमस्तक होण्याची संधी मिळणे हे माझे भाग्य आहे.”
सुमारे १२ वर्षांपूर्वी आलेल्या आपल्या ‘देऊळ’ चित्रपटाची आठवण करून देत ते म्हणाले की, “त्या चित्रपटातून आम्ही समाजातील गोंधळावर आणि देवाच्या नावाखाली चालणाऱ्या गोष्टींवर प्रकाश टाकला होता. मात्र, आज इतक्या वर्षांनंतरही राज्यातील परिस्थिती तशीच आहे, हे पाहून खेद वाटतो. आजही लोक विविध भोंदू बाबांच्या आहारी जात आहेत.”
सत्याशोधक विचारांची गरज
गिरीश कुलकर्णी यांनी यावेळी राजकीय नेते आणि शासकीय अधिकाऱ्यांच्या वागणुकीवरही बोट ठेवले. ते म्हणाले, “माणूस कोणत्याही पदावर असला तरी शेवटी तो माणूसच आहे. आज मानवी चारित्र्यावर मोठे संकट आहे. अशा काळात महात्मा फुले यांचे चरित्र वाचणे आणि आत्मसात करणे गरजेचे आहे. अंगावर शेण फेकले जात असतानाही आपले समाजकार्याचे व्रत न सोडणारे जोतिबा आजही आम्हा सर्वांसाठी आदर्श आहेत.”
सामाजिक ऐक्याचे आवाहन
समाजाने एकमेकांवर दोषारोप करण्यापेक्षा ‘सत्याशोधक’ वृत्तीने एकत्र येण्याची गरज असल्याचे त्यांनी सांगितले. “आपण पुन्हा एकदा आपल्या महापुरुषांच्या विचारांच्या वाटेवर चालले पाहिजे. समाजाला सत्याकडे, न्यायाकडे आणि समतेकडे नेण्यासाठी एकत्रित प्रयत्न व्हायला हवेत,” असे आवाहन त्यांनी केले.
शेवटी, महात्मा जोतिराव फुले आणि क्रांतीज्योती सावित्रीबाई फुले यांच्या स्मृतीला अभिवादन करून त्यांनी आपल्या भावनांना पूर्णविराम दिला.
Actor Girish Kulkarni expresses regret at Phule Wada!
महत्वाच्या बातम्या
- Mandatory PNG Shift : सुविधेच्या ठिकाणी पीएनजी जोडणी घ्यावीच लागणार; एलपीजीवरील ताण कमी करण्यासाठी निर्णय
- देशात अनेक शहरांमध्ये इंधनासाठी रांगा; पण प्रत्यक्षात देशात इंधनाचा पुरेसा साठा; मोदी सरकारचा खुलासा
- Amid West Asia : एप्रिलमध्ये रशियाकडून 6 कोटी बॅरल कच्चे तेल खरेदी करेल भारत; सवलतीऐवजी प्रीमियमवर मिळेल
- कुटुंब टिकले तरच धर्म आणि राष्ट्र टिकेल, समाज सुरक्षित राहील; पुण्यातल्या कोथरूड मधल्या विराट संमेलनात एकमुखी सूर
