सोनम वांगचुक यांना रुग्णालयात दाखल करणे योग्यच; खासगी रुग्णालयात हलविण्यास दिल्ली उच्च न्यायालयाचा नकार

विशेष प्रतिनिधी

नवी दिल्ली: पर्यावरण कार्यकर्ते सोनम वांगचुक यांना उपोषणस्थळावरून हटवून रुग्णालयात दाखल करण्याची दिल्ली पोलिसांची कारवाई मनमानी नव्हती, असे महत्त्वपूर्ण निरीक्षण दिल्ली उच्च न्यायालयाने नोंदवले आहे. त्याचबरोबर वांगचुक यांना सफदरजंग रुग्णालयातून कुटुंबाच्या पसंतीच्या खासगी रुग्णालयात हलविण्याची मागणीही न्यायालयाने फेटाळून लावली.

सोनम वांगचुक दिल्लीतील जंतर-मंतर येथे गेल्या २१ दिवसांपासून उपोषणाला बसले होते. त्यांच्या आंदोलनाला देशभरातील विद्यार्थी, सामाजिक कार्यकर्ते आणि विविध राजकीय पक्षांच्या नेत्यांकडून पाठिंबा मिळत होता. अनेक नेत्यांनी आंदोलनस्थळी भेट देऊन त्यांच्या मागण्यांना समर्थन दिले होते.

दरम्यान, १८ जुलै रोजी सकाळी दिल्ली पोलिसांनी वांगचुक यांना उपोषणस्थळावरून हटवून सफदरजंग रुग्णालयात दाखल केले. वांगचुक यांची प्रकृती खालावत असल्याने त्यांना तातडीने वैद्यकीय उपचारांची आवश्यकता होती, अशी भूमिका दिल्ली पोलिसांनी मांडली.

• मुख्यमंत्री देवेंद्र फडणवीस यांच्या वाढदिवशी जाहिरात, होर्डिंग, उत्सव नको! पक्षातर्फे आवाहन

मात्र, पोलिसांच्या या कारवाईवर वांगचुक यांच्या समर्थकांनी आणि काही राजकीय नेत्यांनी तीव्र नाराजी व्यक्त केली. वांगचुक यांना त्यांच्या इच्छेविरुद्ध उपोषणस्थळावरून हटविण्यात आले आणि सरकारी रुग्णालयात दाखल करण्यात आले, असा आरोप करण्यात आला होता.

याप्रकरणी वांगचुक यांच्या पत्नी डॉ. गीतांजली आंग्मो यांनी दिल्ली उच्च न्यायालयात याचिका दाखल केली. सोनम वांगचुक यांना सफदरजंग रुग्णालयाऐवजी कुटुंबाने निवडलेल्या खासगी रुग्णालयात उपचारासाठी हलविण्याची परवानगी द्यावी, अशी मागणी याचिकेत करण्यात आली होती.

वांगचुक यांना त्यांच्या इच्छेविरुद्ध सरकारी रुग्णालयात ठेवण्यात आले असून सध्या दिल्या जाणाऱ्या वैद्यकीय उपचारांबाबत कुटुंबाला विश्वास नसल्याचेही याचिकेत नमूद करण्यात आले होते.

मात्र, उपलब्ध वैद्यकीय परिस्थिती आणि वांगचुक यांच्या प्रकृतीचा विचार करता त्यांना रुग्णालयात दाखल करण्याची पोलिसांची कारवाई योग्य होती, असे न्यायालयाने स्पष्ट केले. त्यामुळे पोलिसांची कारवाई मनमानी असल्याचा दावा न्यायालयाने मान्य केला नाही.

तसेच, सध्या वांगचुक यांच्यावर योग्य उपचार सुरू असल्याचे नमूद करत त्यांना खासगी रुग्णालयात हलविण्याची मागणीही उच्च न्यायालयाने फेटाळली. या निर्णयामुळे वांगचुक यांच्यावर सफदरजंग रुग्णालयातच उपचार सुरू राहणार आहेत.

Delhi High Court Upholds Sonam Wangchuk’s Hospitalisation, Rejects Plea for Private Facility