बारामतीत शिकाऊ विमान कोसळले; चार महिन्यांपूर्वी अजित पवारांच्या अपघाताची आठवण ताजी

विशेष प्रतिनिधी

बारामती : चार महिन्यांपूर्वी दिवंगत उपमुख्यमंत्री अजित पवार यांच्या विमान अपघाताने हादरलेल्या बारामतीत पुन्हा एकदा शिकाऊ विमान कोसळल्याची घटना घडली आहे. रेडबर्ड कंपनीचे प्रशिक्षणार्थी विमान गोजुबाबी गावाच्या हद्दीत कोसळल्याने परिसरात मोठी खळबळ उडाली. सुदैवाने या अपघातात शिकाऊ वैमानिक सुरक्षित असल्याची प्राथमिक माहिती समोर आली आहे.

मिळालेल्या माहितीनुसार, रेडबर्ड एव्हिएशन अकॅडमीचे हे प्रशिक्षण विमान नियमित सरावासाठी उड्डाण करत होते. दरम्यान अचानक तांत्रिक बिघाड अथवा अन्य कारणामुळे विमानाचा ताबा सुटल्याने ते गोजुबाबी गावाजवळ कोसळले. अपघातानंतर स्थानिक नागरिकांनी घटनास्थळी धाव घेतली. घटनेची माहिती मिळताच पोलीस आणि प्रशासनाचे पथक तातडीने घटनास्थळी दाखल झाले असून परिसर बंदोबस्ताखाली घेण्यात आला आहे.

• फडणवीसांच्या घोषणेची पुण्यात होणार अंमलबजावणी; चार ठिकाणी भुयारी मार्ग…

या अपघाताचे नेमके कारण अद्याप स्पष्ट झालेले नाही. तांत्रिक बिघाड, हवामान किंवा मानवी चूक यापैकी कोणत्या कारणामुळे विमान कोसळले, याचा तपास सुरू करण्यात आला आहे. नागरी विमान वाहतूक विभागाकडूनही चौकशी होण्याची शक्यता आहे.

विशेष म्हणजे, याच गोजुबावी गावाच्या परिसरात चार महिन्यांपूर्वी दिवंगत उपमुख्यमंत्री अजित पवार यांच्या विमानाचा अपघात झाला होता. त्यामुळे पुन्हा त्याच भागात घडलेल्या या घटनेमुळे चिंतेचे वातावरण निर्माण झाले आहे.

Training Aircraft Crashes in Baramati; Revives Memories of Ajit Pawar’s Plane Accident Four Months Ago